पुणे जिल्ह्याच्या सर्वांगीण विकासाला गती देणाऱ्या सुमारे ₹१८,७००.३६ कोटी खर्चाच्या तीन महत्त्वपूर्ण उन्नत महामार्ग (एलिव्हेटेड फ्लायओव्हर) प्रकल्पांच्या भूमिपूजन व शुभारंभ सोहळ्याचे आयोजन पुण्यातील गणेश कला क्रीडा मंच येथे मोठ्या उत्साहात पार पडले. या प्रकल्पांमध्ये पुणे–शिरूर, हडपसर–यवत आणि तळेगाव–चाकण–शिक्रापूर या महत्त्वाच्या मार्गांचा समावेश असून, ते पुणे जिल्ह्याच्या वाहतूक व्यवस्था, औद्योगिक विकास आणि आर्थिक प्रगतीसाठी अत्यंत महत्त्वाचे ठरणार आहेत. राज्याचे मुख्यमंत्री मा. ना. श्री. देवेंद्र फडणवीस आणि केंद्रीय रस्ते वाहतूक व महामार्ग मंत्री मा. ना. श्री. नितीन गडकरी यांच्या प्रमुख उपस्थितीत हा सोहळा पार पडला. यावेळी उपमुख्यमंत्री तथा पुणे जिल्ह्याच्या पालकमंत्री मा. ना. श्रीमती सुनेत्राताई पवार, मंत्री मा. ना. श्री. चंद्रकांतदादा पाटील, मा. ना. श्री. शिवेंद्रराजे भोसले तसेच पुणे जिल्ह्यातील खासदार, आमदार आणि विविध लोकप्रतिनिधी उपस्थित होते.

या प्रकल्पांची एकूण लांबी सुमारे १३८.१ किलोमीटर असून, त्यांची उभारणी बी.ओ.टी. (Build-Operate-Transfer) पद्धतीने करण्यात येणार आहे. पुढील चार वर्षांत हे प्रकल्प पूर्ण करण्याचे उद्दिष्ट निश्चित करण्यात आले आहे. पुणे शहर आणि परिसरातील वाढती वाहतूक कोंडी लक्षात घेऊन या प्रकल्पांची आखणी करण्यात आली असून, यामुळे दैनंदिन प्रवास अधिक सुरक्षित, जलद आणि सुलभ होणार आहे. शहरातील मुख्य रस्त्यांवरील वाहतुकीचा ताण कमी होऊन प्रवाशांचा वेळ व इंधनाची बचत होईल, तसेच ग्रामीण आणि औद्योगिक भागांना अधिक प्रभावी रस्ते संपर्क उपलब्ध होईल. या महामार्गांमुळे पुणे जिल्ह्यातील औद्योगिक क्षेत्राला मोठी चालना मिळणार आहे. विशेषतः चाकण, तळेगाव, शिक्रापूर आणि शिरूरसारख्या औद्योगिक पट्ट्यांमध्ये मालवाहतुकीची गती वाढेल, उद्योगांना सक्षम दळणवळण व्यवस्था मिळेल आणि नवीन गुंतवणुकीला प्रोत्साहन मिळेल. वाहतूक खर्चात घट, निर्यात-आयात प्रक्रियेत सुलभता आणि उद्योगांच्या विस्तारासाठी आवश्यक असलेली पायाभूत सुविधा उपलब्ध झाल्यामुळे रोजगाराच्या नव्या संधी निर्माण होतील. व्यापार, उद्योग, पर्यटन आणि ग्रामीण अर्थव्यवस्थेलाही या प्रकल्पांचा दीर्घकालीन लाभ होणार आहे. यावेळी उपस्थित मान्यवरांनी राज्याच्या पायाभूत विकासासाठी रस्ते आणि महामार्गांचे महत्त्व अधोरेखित केले. आधुनिक, सुरक्षित आणि वेगवान दळणवळण व्यवस्था ही आर्थिक प्रगतीची गुरुकिल्ली असल्याचे सांगत अशा विकासकामांमुळे नागरिकांचे जीवनमान उंचावेल आणि महाराष्ट्राच्या विकासाला नवी दिशा मिळेल, असा विश्वास व्यक्त करण्यात आला. हे प्रकल्प केवळ रस्ते नसून पुणे जिल्ह्याच्या आर्थिक, औद्योगिक आणि सामाजिक प्रगतीला गती देणारी विकासाची नवी जीवनवाहिनी ठरणार असल्याचे यावेळी नमूद करण्यात आले.